特首林鄭月娥在上任後首份《施政報告》，提及其政綱內的「首置上車盤」，大家以為會一定細節，但實情所知都唔多。暫時單身人士月入34000蚊，資產110.5萬元；而二人家庭月入68000蚊，資產221萬蚊，先至夠資格申請。咁將來即係賣幾錢? 從申請資格上可以推算一下。
首置上車盤: 單身人士最高可負擔484萬元
我地只能倒轉頭推算一下，如果以現時銀行按息2.15厘，假設單身人士將成副身家擺晒上會，最高可負擔樓價係484萬。
咁樓價484萬，又係一個乜野數字? 在私樓市場，沙田第一城或嘉湖山莊，勉強仲搵到數十件滄海遺珠。揸住呢個銀碼衝入一手樓，會買到吹捧為收租極佳嘅蚊型貨色。 所以，「首置上車盤」落實以呢個定位出場，確實係喺遙不可及嘅私樓市場下，提供多一個選擇俾「小中產」，但又會產生乜野效果?
白居二價格水漲船高 合條件會先爭首置上車盤
其中一個可能，係被林特改為「恒常化」嘅白居二，可能會突然無晒焦點。 點解呢? 因為少咗一批競爭者。
假如「首置上車盤」最終不設入息下限，一部份符合白居二資格嘅準買家，九成會先衝向「首置上車盤」市場搏一鋪先。一嚟，可以住新樓。二嚟，散省買白居二按揭年期嘅尷尬問題。三嚟，唔駛喺二手市場同居屋業主討價還價。
事實上，白居二樓價嘅水漲船高，淨係過去半年數字都有目共睹。累計促成964宗買賣中，銀碼超過484萬，亦係我地估計「首置上車盤」嘅最高可負擔樓價，一共有240宗，相當於總額25%。
當然好視乎，政府推幾多「首置上車盤」啦。初步睇， 林鄭都先戴定頭盔，只係以「先導計劃」方式，喺未來招標嘅一幅安達臣用地上推行，透過賣地條款規範中標財團起混合式住房，得一千個單位咁大把。會唔會同「港人港地」只此一次，下不為例? 咁就要五年任期過後，先至可以驗證。
